23 of March 2019, at 9.54 am

2800 वर्षे जुने अतिशय सुंदर शहर

येस न्युज मराठी नेटवर्क: जगात साधारण दोन हजार वर्षांपेक्षा जास्त काळ वस्ती असलेल्या शहरांना प्राचीन शहरे म्हटले जाते. इटलीतील रोम इंटर्नल शहर म्हणून ओळखले जाते तसेच भारतातील वाराणसी प्राचीन नगरी किंवा स्वर्ग नगरी म्हणून प्रसिद्ध आहे. सोविएत संघातून फुटून निघाल्यावर सध्या स्वतंत्र भोगत असलेल्या अर्मानिया या चिमुकल्या देशाची राजधानी येरेवान हे असेच प्राचीन शहर असून हे शहर 2800 वर्षे जुने असल्याचे इतिहास सांगतो. या देशाची लोकसंख्या आहे 30 लाख. मात्र या देशाचे नाव जगात प्रसिद्ध झाले ते येथे झालेल्या वेलवेट क्रांतीमुळे. दीर्घकाळ पंतप्रधान राहिलेल्या नेत्यास त्याचे पद सोडून पायउतार होण्यासाठी ही शांततापूर्ण क्रांती केली गेली आणि ती जगात गाजली. येरेवान हे शहर प्राचीन असले तरी अतिसुंदर, शांत आहे आणि त्यामुळे येथे पर्यटकांची गर्दी नेहमीच होते. येथील नागरिक अतिशय मोकळ्या मनाचे आणि चटकन मैत्री करणारे आहेत. खाणे-पिणे आणि गप्पा हे त्यांना अतिप्रिय. या शहरातील बहुतेक सर्व लोक एकमेकांना ओळखतात. शहरातील सर्व नागरिक आमचे मित्र, शेजारी आणि सहकारी आहेत असे येथील नागरिक सांगतात. या लोकांना परदेशी भाषा चटकन आत्मसात करण्याचे अनोखे कौशल्य लाभले आहे. पर्यटकही त्यांच्या या कौशल्याने आश्चर्यचकित होतात. येथे इंग्रजी, रशियन, फ्रेंच, स्पॅनिश आणि फारसी भाषा बोलल्या जातात. या शहरात सतत काही न काही उत्सव साजरे होत असतात.

Comments